Arsenal vanga ka tawrhna

He thu hi Mizo tawng ngeia ziah ka duh. English chuan ka duh angin ka soi thiamlo palh ang. Sawi tan nghal deuh mawp mawp mai ila. (paragraph tharah te han ti mawi ve ila)

Kar hnih vel liam ta khan ka thian thenkhat te nen kan office bang dinner eichhuak ang u kan tia kan han inrawt phur ve vel a. Chutah Sparky's Diner ah sa duhtawkin a ei theih tih kan zinga mi pakhatin a han sawi chu hmun dang tumahin kan sawi tawhlo. Kan pan ta nghal chat a. Bawngsa ei treuh chiah rilruah a om tawh. Kan va thleng ve ta rawih reng a. Mi an lo tam angreng hle a. Keini ai chuan sum leh pai lamah an harsa lo tih hriat reng reng hlir mai an lo phe suau suau mai a. Mahni insit duh bik chuanglo chuan intithei fahran hian kan va thu ve thap mai a.

Chaw kan ei tran dawn tihah chuan kut te ka va sil ve a, mi tih ang te te in. Chuta ka thutna ka pan lehna kawnga ka thil tawn chu a rapthlakin a rilru nat thlak phian mai. An waiter pakhat, American tlangval, pian lamah chuan chhuan tur neilo ve tak mai hian ka kawr hak chu lo hmu fuh ve ngang aniang chu. "Engtin nge Arsenal i tan theih a?" tih zawhna mawl angreng pui chu min lo zawt nulh roh a. Chhan ngaihna ka hrelo lek lek zawk. "Khawvelah anni aia club tha an omlo" kan ti ve khauh mai a (dawt ni heklo). Chutah a nui liam mai dawn emaw tih laiin, "Khawvela club chhe ber i tan" min han ti leh mai chu. "Nang hian chuti chuan min ti maw, lula hnam kan nih hi" tih a reh deuh nawk nawk mai kha ka duh mai a. Football pawh kut khelh na ram atanga lo kal khan khatia min ti kha ka arsenal rilru hi ana thlawt ani. Chu pa pui roh chuan a uniform korkilh chu a phelh nuap nuap a, a chhungah kawr dnag alo ha chu niin. A kawr chu ka han hmuh chiang chuan Chelsea jersey alo ha ve trut chu niin. "Aw!!! vala, ilo bo thui em anih hi" tih pah chuan ka thutna lam chu ka pan ta hnak hnak a.

Chu thil thleng chu ka theihnghilh mai dawn emaw tih naklaiin, ka la na tawlh2 mai hian ka hria a. Ngawih bo pui mai chu a harsa aniang e. Hei thei leh theiloin kan ziak chhuak ta nawk nawk mai. Arsenal lama kan hotute zuk hrilh hial kha ka duh a. Mahse, an lo la na lutuk anga game lamah te nghawng te a nei palh ang tih ka hlau a ka insum hram hram a. Manchester jersey lo ha phei se chuan court hial ka thlenpui ang.

Hemi thu ka ziah lai hian ka rilruah thu alo thleng a. Kan duh te hi inang vek ta se, khovelah hian buaina nasa zawk a thleng ang em? Midang tana engmah nilo kha a thenin lungawi taka an lo pawm a, an hlimpui chuan, chu tluka thil tha a awm chuang dawn em ni? te ka han ti ve deuh a.